KENYA: WATU 5 WAFARIKI KATIKA MLIPUKO EASTLEIGH

Watu kama watano hivi wameripotiwa kuuawa katika mripuko uliolenga kulipua basi la abiria katika mtaa wa Eastleigh, Nairobi eneo ambalo linakaliwa na wakaazi wengi wenye asili ya Kisomali.

Basi la abiria maarufu kama matatu likiwa limeharibiwa vibaya baada ya mlipuko huo kutokea katika mtaa wa Eastleigh. (Picha: Citizen)

Shambulio hilo lililenga basi la "matatu" lilokuwa likitoka katikati ya mji.

Naibu msemaji wa polisi wa Kenya, Charles Owino, alieleza kuwa bomu liliripuka ndani ya basi lilipokuwa likipita mtaa wa Eastleigh.

Dakika chache baadae vijana waliokuwa na hasira walianzisha fujo wakiwalenga watu wenye jamii ya Kisomali wanaoishi katika mtaa huo. kitendo kilichopelekea Polisi kufyatua risasi hewani ili kuwatawanya watu hao.

Mtu mmoja ambaye anahisiwa kuwa ni mtegaji wa bomu hilo amepelekwa Hospitali ya Taifa ya Kenyatta kwa matibabu huku akiwa chini ya ulinzi mkali wa jeshi la polisi.

(Vyanzo: BBC, CITIZEN)